బాబు తెలంగాణ డ్రామాలు: దేవేందర్

కరీంనగర్: తెలంగాణ విషయంలో తెలుగుదేశం పార్టీ అధ్యక్షుడు నారా చంద్రబాబు నాయుడు డ్రామాలాడుతున్నారని నవ తెలంగాణ ప్రజా పార్టీ (ఎన్టీపిపి) నాయకుడు టి. దేవేందర్ గౌడ్ వ్యాఖ్యానించారు. చంద్రబాబు వాగ్దానాలను తెలంగాణ ప్రజలు విశ్వసించబోరని ఆయన బుధవారం మీడియా ప్రతినిధులతో అన్నారు. ఆయన సిరిసిల్ల నేత కార్మికుల కుటుంబాలను పరామర్శించారు. తెలంగాణపై తెలుగుదేశం పార్టీకి చిత్తశుద్ధి లేదని ఆయన అన్నారు.

2009 ఎన్నికల్లో విజయం సాధించి అధికారాన్ని కైవసం చేసుకోవడానికే చంద్రబాబు తెలంగాణ మంత్రం జపిస్తున్నారని ఆయన విమర్శించారు. ప్రస్తుతం ఉన్న పొత్తుల అంశాలు నాలుగు రోజుల్లో మారిపోతాయని, రాష్ట్రంలో మూడో ప్రత్యామ్నాయం ఏర్పడడం ఖాయమని ఆయన అన్నారు. నేత కార్మికుల సమస్యలను పరిష్కరించడంలో ప్రభుత్వం విఫలమైందని ఆయన విమర్శించారు. ప్రభుత్వ విధానాల వల్లనే నేత కార్మికుల ఆత్యహత్యలు, ఆకలిచావులు జరుగుతున్నాయని ఆయన అన్నారు.