చిరు రక్తనిధిపై ఏం చేశారు? : కెసిఆర్

హైదరాబాద్: ప్రజారాజ్యం అధినేత చిరంజీవి రక్తనిధి కేంద్రంలో అక్రమాలు ఉంటే కాంగ్రెస్ ప్రభుత్వం ఇంత కాలం ఎందుకు చర్యలు తీసుకోలేదని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ప్రశ్నించారు. రాష్ట్రంలో గత ఐదేళ్లుగా కాంగ్రెస్ అధికారంలో ఉందని, ఇన్నేళ్లు ప్రశ్నించకుండా ఇప్పుడు విమర్శించడంలో అర్థం లేదని ఆయన మంగళవారంనాడు అన్నారు. ప్రజాస్వామ్యంలో పార్టీ పెట్టుకునే హక్కు ఎవరికైనా ఉందని, పదేళ్ల క్రితమే చిరంజీవి రక్తనిధి కేంద్రాన్ని ఏర్పాటు చేశారని ఆయన అన్నారు. చిరంజీవికి దేశంలోని అత్యున్నత పురస్కారాల్లో ఒక్కటైన పద్మభూషణ్ ఇచ్చి గౌరవించారని, అలాంటి వ్యక్తి చేపట్టిన స్వచ్ఛంద సేవా కార్యక్రమాలను విమర్శించడం తగదని ఆయన అన్నారు.

తెలంగాణకు వ్యతిరేకంగా మజ్లీస్ నేత అసదుద్దీన్ ఓవైసీ మాట్లాడడంపై కెసిఆర్ ధ్వజమెత్తారు. తెలంగాణ ఓవైసీ జాగీరు కాదని, తెలంగాణ ముస్లింలందరికీ ఓవైసీ టేకేదార్ కారని ఆయన అన్నారు. ముఖ్యమంత్రి వైయస్ రాజశేఖర రెడ్డికి ఓవైసీ చెంచాగిరి చేస్తున్నారని ఆయన అన్నారు. హైదరాబాదులోని పాతబస్తీలో మజ్లీస్ పిడికెడు కూడా లేని పార్టీ అని ఆయన అన్నారు. కాంగ్రెస్ పార్టీని భూస్థాపితం చేయడమే తన లక్ష్యమని ఆయన చెప్పారు. వైయస్ రాజశేఖర రెడ్డి గుడ్డిగా, మొండిగా తెలంగాణను వ్యతిరేకిస్తున్నారని ఆయన విమర్శించారు.