రోజా సంస్కారానికే వదిలేస్తున్నా: నాగబాబు

రాజమండ్రి: తమ పార్టీ నేత చిరంజీవిపై చేస్తున్న విమర్శలను తెలుగు మహిళ అధ్యక్షురాలు రోజా సంస్కారానికే వదిలేస్తున్నానని ప్రజారాజ్యం పార్టీ నాయకుడు, చిరంజీవి సోదరుడు నాగబాబు అన్నారు. చిరంజీవిపై రోజా చేసిన విమర్శలపై ఆయన బుధవారంనాడు ఆ విధంగా ప్రతిస్పందించారు. చిరంజీవిపై రాష్ట్ర వ్యవసాయ శాఖ మంత్రి ఎన్. రఘువీరా రెడ్డి చేస్తున్న విమర్శలకు కూడా సమాధానం చెప్పాల్సిన అవసరం లేదని ఆయన అన్నారు.

నాగబాబు బుధవారం తూర్పు గోదావరి జిల్లాలో పర్యటించారు. ఆయన పర్యటన వివరాలను గోప్యంగా ఉంచారు. మీడియాకు గానీ, పార్టీ కార్యకర్తలకు గానీ ఆయన పర్యటన వివరాలను వెల్లడించలేదు. చిరంజీవి పర్యటనపై, జిల్లాలో పార్టీ పరిస్థితిపై సమీక్షించడానికి ఆయన ఇక్కడికి వచ్చారు. పార్టీ సమన్వయకర్తలతో ఆయన సమావేశమయ్యారు. జిల్లాలో నియోజకవర్గాలవారీగా పార్టీ పరిస్థితిని అడిగి తెలుసుకున్నారు.