ఆస్పత్రి నుంచి అమితాబ్ డిశ్చార్జ్

ముంబయి: కడుపు నొప్పితో ఆరు రోజుల క్రితం ఆస్పత్రిలో చేరిన బిగ్ బి అమితాబ్ బచ్చన్ శుక్రవారం డిశ్చార్జి అయ్యారు. పఠానీ సూట్, నల్లటి కళ్లద్దాలు ధరించి ఆస్పత్రి వెలుపలికి వచ్చిన ఆయన అక్కడ గుమికూడిన జర్నలిస్టుల వైపు, అభిమానుల వైపు చేతులు ఊపి అభివాదం చేశారు. అయన వెంట కుమారుడు, ప్రముఖ బాలీవుడ్ నటుడు అభిషేక్ బచ్చన్ ఉన్నారు. ఆ తర్వాత లెక్షస్ కారులో ఆస్పత్రి నుంచి నివాసానికి బయలుదేరి వెళ్లారు. తన 66వ జన్మ దిన వేడుకలు జరుపుకుంటుండగా అస్వస్థతకు గురైన అమితాబ్ ను ఈ నెల 11వ తేదీన లీలావతి ఆస్పత్రిలో చేర్చారు. కడుపు నొప్పితో బాధపడుతున్న అమితాబ్ కు వైద్యులు పరీక్షలు నిర్వహించి చికిత్స అందజేశారు.

తన తండ్రి ఆస్పత్రిలో ఉండగా తగిన సహకారం అందించిన అభిమానులకు, జర్నలిస్టులకు అభిషేక్ బచ్చన్ కృతజ్ఞతలు తెలిపారు. అమితాబ్ ఆస్పత్రిలో చేరడంతో ఆయన కుటుంబ సభ్యుల సినిమా షూటింగులన్నీ దెబ్బ తిన్నాయి. మణిరత్నం నిర్మిస్తున్న రావణ చిత్రం కోసం అభిషేక్, ఆయన భార్య ఐశ్వర్య రాయ్ కేరళ వెళ్లాల్సి ఉంది. ముంబయిలో తీన్ పాటీ సినిమా షూటింగులో అమితాబ్ స్వయంగా పాల్గొనాల్సి ఉండింది. ఇదిలా ఉంటే, ఈ కుటుంబానికి మరో దుర్వార్త కూడా చేరింది. ఐశ్వర్య తండ్రి కృష్ణరాజ్ రాయ్ అస్వస్థతతో బుధవారం రాత్రి ముంబయిలో హిందూజ ఆస్పత్రిలో చేరారు.