సోనియాతో డిఎస్ సమావేశం

న్యూఢిల్లీ: ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ శుక్రవారంనాడు కాంగ్రెస్ అధ్యక్షురాలు సోనియా గాంధీతో సమావేశమయ్యారు. రాష్ట్రంలోని తాజా రాజకీయ పరిస్థితులపై తాను సోనియాతో చర్చించినట్లు ఆయన సమావేశానంతరం మీడియా ప్రతినిధులతో చెప్పారు. తెలంగాణపై చర్చించారా అని అడిగితే ఆ అంశం కూడా చర్చకు వస్తుంది కదా అని ఆయన అన్నారు.

పిసిసి కార్యవర్గ జాబితా బాగానే ఉందని ఆయన అన్నారు. శాసనమండలి చైర్మన్ చక్రపాణిని పార్టీ మేనిఫెస్టో కమిటీ చైర్మనుగా నియమించడాన్ని ఆయన సమర్థించుకున్నారు. పిసిసి కార్యవర్గం తొలి జాబితాను పార్టీ అధిష్ఠానవర్గం ప్రకటించిన తర్వాత శ్రీనివాస్ సోనియాను కలవడం ఇదే తొలిసారి. ముఖ్యమంత్రి డాక్టర్ వైయస్ రాజశేఖర రెడ్డి అనుచరులకే కార్యవర్గంలో ప్రాధాన్యం లభించిందనే వార్తల నేపథ్యంలో ఆయన భేటీ ప్రాధాన్యం సంతరించుకుంది.