యాదగిరిగుట్ట నుంచి చిరంజీవి యాత్ర

హైదరాబాద్: ప్రజారాజ్యం అధినేత చిరంజీవి మలి విడత ప్రజా అంకిత యాత్ర తెలంగాణలోని నల్లగొండ జిల్లాలో గల ప్రతిష్ఠాత్మకమైన యాదగిరి గుట్ట శ్రీ లక్ష్మీనరసింహస్వామి సన్నిధి నుంచి ప్రారంభమయ్యే అవకాశాలున్నట్లు తెలుస్తోంది. ఆయన మలి విడత పర్యటన తెలంగాణ జిల్లాల్లో ఈ నెల 30వ తేదీ నుంచి జరిగే అవకాశం ఉంది. ఈ నెల 23వ తేదీన గానీ, 24వ తేదీన గానీ ప్రారంభించాలనుకున్నా సాధ్యం కాకపోవడంతో 30వ తేదీ నుంచి ప్రారంభించాలని చిరంజీవి నిర్ణయించుకున్నట్లు సమాచారం.

తెలంగాణ జిల్లాల్లో తన పర్యటనకు సంబంధించిన తేదీలను, రోడ్ మ్యాప్ లను ఖరారు చేయకపోవడంపై ఆయన సోమవారంనాడు ప్రజారాజ్యం పార్టీ ముఖ్యులపై మండి పడినట్లు సమాచారం. ఈ నెల 30వ తేదీ నుంచి ఆయన మలి విడత పర్యటన 8 రోజుల పాటు తెలంగాణ నాలుగు జిల్లాల్లో జరుగుతుంది. వరంగల్, కరీంనగర్, ఖమ్మం, నల్లగొండ జిల్లాల్లో ఈ పర్యటన సాగుతుంది. ఈ నాలుగు జిల్లాల్లో పర్యటించిన అనంతరం రాయలసీమ జిల్లాల్లో పర్యటించనున్నట్లు తెలుస్తోంది.