కెసిఆర్ కు గద్దర్ సూచన

హైదరాబాద్: తెలంగాణ ఉద్యమాన్ని తల్లికోడిలా కాపాడాలని ప్రముఖ వాగ్గేయకారుడు గద్దర్ తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు సూచించారు. కెసిఆర్ ను ఆయన సోమవారం సాయంత్రం కలిశారు. చాలా కాలంగా వీరిద్దరూ దూరంగా ఉంటున్నారు. వారిద్దరి మధ్య గంటకు పైగా చర్చలు జరిగాయి. ఆ తర్వాత వీరిద్దరు కలిసి మీడియా ప్రతినిధులతో మాట్లాడారు. ఎనిమిదేళ్లుగా తెలంగాణ ఉద్యమాన్ని నడిపిస్తూ వస్తున్న కెసిఆర్ ను గద్దర్ అభినందించారు. ఇప్పటికైనా జై తెలంగాణ అంటే ముఖ్యమంత్రి వైయస్ రాజశేఖర రెడ్డికి దండం పెడతానని ఆయన అన్నారు.

కాంగ్రెస్ తో తమకు ఎలాంటి గెట్టు పంచాయతీ లేదని అంతకు ముందు కెసిఆర్ మీడియా ప్రతినిధుల సమావేశంలో అన్నారు. కాంగ్రెస్ తో పొత్తు పెట్టుకోవడానికి తెరాస సిద్ధమేనా అని అడిగిన ప్రశ్నకు ఆయన ఆ విధంగా అన్నారు. తెలంగాణ రాష్ట్ర ఏర్పాటుకు అనుకూలంగా కాంగ్రెస్ వ్యవహరించాలన్నదే తమ అభిమతమని ఆయన అన్నారు. తెలంగాణ రాష్ట్ర ఏర్పాటుకు కాంగ్రెస్ చిత్తశుద్ధితో వ్యవహరించడం లేదని ఆయన విమర్శించారు.