బాలయ్య సిఎం ఇప్పుడే కారు: గోరంట్ల

హైదరాబాద్: తమ బాబాయ్, ప్రముఖ సినీ నటుడు బాలకృష్ణ ముఖ్యమంత్రి అవుతారని సినీ నటుడు తారకరత్న చేసిన వ్యాఖ్యల విషయంలో తెలుగుదేశం పార్టీ నష్టనివారణ చర్యలను చేపట్టినట్లు కనిపిస్తోంది. బాలకృష్ణ ఇప్పుడే ముఖ్యమంత్రి అవుతారని తారకరత్న ఉద్దేశం కాదని తెలుగుదేశం పార్టీ నాయకుడు గోరంట్ల బుచ్చయ్య చౌదరి మంగళవారం మీడియా ప్రతినిధులతో అన్నారు. తారకరత్న వ్యాఖ్యల్లో తప్పేమీ లేదని ఆయన అన్నారు. వచ్చే నెల 5వ తేదీన గుంటూరులో జరిగే యువగర్జన సదస్సుకు జూనియర్ ఎన్టీఆర్ కూడా వస్తారని ఆయన చెప్పారు. బాలకృష్ణ ముఖ్యమంత్రి కావాలని కోరుకోవడంలో తప్పు లేదని, ఇప్పుడే బాలయ్య ముఖ్యమంత్రి అవుతారనేది తారకరత్న ఉద్దేశం కాదని, తర్వాత తర్వాత ముఖ్యమంత్రి అవుతారని ఉద్దేశమని ఆయన వివరణ ఇచ్చారు.

తెలుగుదేశం పార్టీకి పూర్వ వైభవం కల్పించడమే తమ ఉద్దేశమని నందమూరి హీరోలు కళ్యాణ్ రామ్, తారకరత్న చెప్పినట్లు వార్తలు వస్తున్నాయి. ముఖ్యమంత్రి ఎవరనేది తమ నాన్న హరికృష్ణ, బాబాయ్ బాలకృష్ణ, మామ, తెలుగుదేశం పార్టీ అధ్యక్షుడు నారా చంద్రబాబునాయుడు కూర్చుని చర్చించుకుంటారని వారంటున్నట్లు సమాచారం.