జంతర్ మంతర్ వద్ద దేవేందర్ దర్నా

న్యూఢిల్లీ: తెలంగాణ రాష్ట్ర ఏర్పాటు పట్ల ప్రభుత్వ ఉదాసీన వైఖరిని నిరసిస్తూ నవ తెలంగాణ పార్టీ(ఎన్టీపి) నాయకులు, ప్రజా సంఘాల ప్రతినిధులు బుధవారం ఢిల్లీలోని జంతర్ మంతర్ వద్ద ధర్నాకు దిగారు. ఎన్టీపి నేత టి. దేవేందర్ గౌడ్ కూడా ఈ ధర్నాలో పాల్గొన్నారు. తెలంగాణ రాష్ట్ర ఏర్పాటుపై కేంద్ర, రాష్ట్ర ప్రభుత్వాలు ఉదాసీన వైఖరి అవలంబిస్తున్నాయని దేవేందర్ గౌడ్ విమర్శించారు. తెలంగాణ రాష్ట్ర ఏర్పాటుకు వెంటనే పార్లమెంటులో బిల్లు ప్రతిపాదించాలని ఆయన యుపిఎ ప్రభుత్వాన్ని డిమాండ్ చేశారు.

తెలంగాణ రాష్ట్ర ఏర్పాటుకు మద్దతు కూడగట్టడానికి ప్రతినిధుల బృందంతో దేవేందర్ గౌడ్ ఢిల్లీకి వచ్చారు. ప్రధాని డాక్టర్ మన్మోహన్ సింగ్, కాంగ్రెస్ అధ్యక్షురాలు సోనియా గాంధీ తదితరులను కలుసుకుని తెలంగాణ రాష్ట్ర ఏర్పాటుకు చర్యలు తీసుకోవాలని ఆయన కోరాలనుకున్నారు. అయితే, వారిని ఆయన ఇప్పటి వరకు కలుసోకలేకపోయారు. ప్రతిపక్ష నాయుడు ఎల్.కె. అద్వానీని మాత్రం కలుసుకుని చర్చలు జరిపారు.