మరిన్ని కష్టాల్లో రాజ్ థాకరే

ముంబయి: మహారాష్ట్ర నవ నిర్మాణ సేన (ఎంఎన్ఎస్) అధినేత రాజ్ థాకరే చుట్టూ మహారాష్ట్ర ప్రభుత్వం ఉచ్చు బిగిస్తోంది. రాష్ట్రంలోని వివిధ ప్రాంతాల్లో ఆయనపై మరిన్ని కేసులు పెట్టేందుకు ప్రభుత్వం సిద్ధపడుతోంది. రెచ్చగొడుతున్న ప్రసంగాలు చేసినందుకు గాను ఆయనపై సతారా, షోలాపూర్, జల్గావ్, పంధార్పూర్ లలో రాజ్ థాకరేపై కేసులు నమోదయ్యాయి. బుధవారం ఆయన బెయిల్ కోసం కోర్టులో హాజరు కావడానికి ముందే మరిన్ని కేసుల్లో ఆయనను ఇరికించేందుకు ప్రభుత్వం సిద్ధపడిండి.

కంజూర్ మార్గ్ సంఘటనకు సంబంధించి రాజ్ పై చర్యకు ప్రభుత్వం కోరుతున్నది. విఖ్రోలీ కేసులో రాజ్ థాకరేకు బెయిల్ నిరాకరించాలని ప్రభుత్వం కోర్టును కోరబోతున్నది. రాజ్ థాకరే గతంలో ఈ ఏడాది ఫిబ్రవరి 13వ తేదీన అరెస్టయ్యారు. అయితే వెంటనే బెయిల్ పై విడుదలయ్యారు. రెచ్చగొట్టే ప్రసంగాలు చేయకూడదని షరతు విధించి కోర్టు బెయిల్ మంజూరు చేసింది. అయితే ఆయన కోర్టు షరతును ఉల్లంఘించారని ప్రభుత్వం వాదిస్తోంది. పరిస్థితిని సమీక్షించడానికి మహారాష్ట్ర మంత్రివర్గం బుధవారం అత్యవసరంగా సమావేశమైంది. రాజ్ థాకరే రాత్రంతా లాకప్ లోనే ఉన్నారు. మంగళవారం రాత్రి ఎంఎన్ఎస్ కార్యకర్తలు 15 టాక్సీలను ధ్వంసం చేశారు.