సంఘ విద్రోహులపై కఠిన చర్యలు: సిఎం

హైదరాబాద్: సంఘ వ్యతిరేక శక్తుల పట్ల కఠినంగా వ్యవహరించాలని ముఖ్యమంత్రి డాక్టర్ వైయస్ రాజశేఖర రెడ్డి పోలీసు ఉన్నతాధికారులను ఆదేశించారు. రాష్ట్రంలో శాంతిభద్రతల పరిస్థితిపై ఆయన బుధవారం ఉన్నత స్థాయి సమావేశంలో సమీక్షించారు. హైదరాబాదులోని జంట పేలుళ్లు, భైంసా విధ్వంసం తదితర సంఘటనలను ఆయన సమీక్షించారు.

భైంసాలో పరిస్థితి అదుపులో ఉందని సమావేశానంతరం రాష్ట్ర పోలీసు డైరెక్టర్ జనరల్ (డిజిపి) ఎస్.ఎస్.పి. యాదవ్ మీడియా ప్రతినిధులతో చెప్పారు. భైంసా ఘటనకు సంబంధించి 146 మందిపై 30 కేసులు పెట్టినట్లు ఆయన తెలిపారు. వటోలి గ్రామంలో ఆరుగురి సజీవ దహనం ఘటన హత్యేనని ఆయన అన్నారు. ఈ ఘటనపై విచారణ జరుపుతున్నట్లు ఆయన తెలిపారు.