దుర్గ గుడిలో కార్తీకమాసోత్సవాలు

విజయవాడ : ఇంద్రకీలాద్రిపై కొలువై ఉన్న మల్లేశ్వరస్వామికి కార్తీకమాసం సందర్భంగా ఈ నెల 29వ తేదీ నుంచి వచ్చే నెల 27వ తేదీ వరకు ప్రత్యేక అర్చనలు చేయనున్నారు. ఈ ఏడాది తాజాగా పూజలలో భక్తులు పాల్గొనేందుకు కూడా అవకాశం కల్పిస్తూ దేవాదాయ కమిషనర్‌ సుందర్‌కుమార్‌ ఆదేశాలు జారీ చేశారు. ఈ మేరకు దుర్గగుడి ఇవో చంద్రకుమార్‌ కార్తీక మాస పూజల షెడ్యూలును రూపొందిస్తున్నారు. నెలరోజుల పాటు శివపూజలో పాల్గొనదలిచిన భక్తులు ఒక్కసారి ఐదువేల 116 రూపాయల రుసుం చెల్లించాల్సి ఉంటుంది. ఒక్కరోజు మాత్రమే పూజలో పాల్గొనే భక్తులు 316 రూపాయలు చెల్లించాల్సి ఉంటుంది.

మూడు వేళలా అభిషేకాలు

మల్లేశ్వరాలయంలో కార్తీకమాసం నెలరోజులూ మూడు వేళలా మహాన్యాస పూర్వక ఏకాదశ రుద్ర వారాభిషేకాలు నిర్వహించనున్నారు. ఉదయం 6 నుంచి 9గంటల వరకు, ఉదయం 10 నుంచి మధ్యాహ్నం ఒంటిగంట వరకు, మధ్యాహ్నం 2 నుంచి సాయంత్రం 5 గంటల వరకు అభిషేకాలు జరుగుతాయి. మధ్యాహ్నం 1.30 గంటల నుంచి సాయంత్రం 6గంటల వరకు సహస్ర లింగార్చన జరుగుతుంది.

లక్షబిల్వార్చన: వచ్చేనెల 3, 9, 10, 13, 17, 23, 24, 26 తేదీలలో వచ్చే నాలుగు సోమవారాలు, రెండు ఏకాదశులు, పౌర్ణమి, మాసశివరాత్రి రోజులలో మల్లేశ్వరుడికి లక్ష బిల్వార్చన చేస్తారు. 17 వతేదీన జ్వాలాతోరణాన్ని ఆవిష్కరిస్తారు. మాస శివరాత్రి రోజున లక్ష బిల్వార్చనతో పాటు అన్నాభిషేకాన్ని కూడా నిర్వహిస్తారు. ప్రతిరోజూ మధ్యాహ్నం ఒంటిగంట నుంచి రాత్రి 7 గంటల వరకు లక్ష బిల్వార్చన కార్యక్రమం ఉంటుంది.