కెసిఆర్ తో అజిత్ సింగ్ భేటీ

హైదరాబాద్: రాష్ట్రీయ లోకదళ్ పార్టీ నేత అజిత్ సింగ్ గురువారంనాడు తెలంగాణ రాష్ట్ర సమితి (తెరాస) అధినేత కె. చంద్రశేఖరరావుతో భేటీ అయ్యారు. వారిద్దరి మధ్య తాజా రాజకీయాలపై చర్చ జరిగినట్లు సమాచారం. జాతీయ స్థాయిలో రాజకీయ పరిస్థితి అనిశ్చితంగా ఉందని అజిత్ సింగ్ అన్నారు. తాము రాష్ట్ర, జాతీయ రాజకీయాలపై చర్చించామని కెసిఆర్ చెప్పారు. గంట పాటు ఇరువురి మధ్య మంతనాలు సాగాయి. ప్రతి పార్టీ తెలంగాణ గురించి రాష్ట్రంలో మాట్లాడుతున్నాయని, ఇది కెసిఆర్ కృషి వల్ల సాధ్యమైందని అజిత్ సింగ్ అన్నారు.

ఒక ప్రైవేట్ కార్యక్రమంలో పాల్గొనడానికి హైదరాబాద్ వచ్చిన అజిత్ సింగ్ ను కెసిఆర్ విందుకు ఆహ్వానించారు. అందుకు సమ్మతించి అజిత్ సింగ్ కెసిఆర్ ఇంటికి వచ్చారు. తెలంగాణ రాష్ట్ర ఏర్పాటుకు సహకరించాలని కెసిఆర్ అజిత్ సింగ్ ను కోరారు. అందుకు ఆయన స్పష్టమైన హామీ ఇచ్చారు. తెలంగాణ రాష్ట్ర సాధనకు అవసరమైన వ్యూహం విషయంలో అజిత్ సింగ్ కెసిఆర్ కు కొన్ని సూచనలు చేశారు. కెసిఆర్ ఈ నెల 9వ తేదీన తిరుపతి శ్రీవేంకటేశ్వరస్వామిని దర్శించుకోనున్నారు.

కాంగ్రెస్ నేతృత్వంలోని ఐక్య ప్రగతిశీల కూటమి (యుపిఎ) ప్రభుత్వ బలపరీక్ష సమయంలో తెలంగాణ రాష్ట్ర సాధనకు పార్టీల మద్దతును కూడగట్టడానికి కెసిఆర్ ఢిల్లీలో ప్రయత్నించారు. ఇందులో భాగంగా యుపిఎకు వ్యతిరేకంగా పార్టీలను సమీకరించే ప్రయత్నం చేశారు. ఈ సందర్భంగా అజిత్ సింగ్ ను కూడా యుపిఎకు వ్యతిరేకంగా ఆయన తీసుకు రాగలిగారు.