సోదరిగా గుండెలో స్థానం: హరికృష్ణ

గుంటూరు: కేంద్ర మంత్రి దగ్గుబాటి పురంధరేశ్వరికి సోదరిగా తమ హృదయాల్లో తగిన స్థానం ఉంటుందని స్వర్గీయ ఎన్టీరామారావు కుమారుడు, తెలుగుదేశం పార్టీ రాజ్యసభ సభ్యుడు నందమూరి హరికృష్ణ అన్నారు. పురంధరేశ్వరి రాసిన బహిరంగ లేఖకు సమాధానంగా తాము లేఖను రాయాలని అనుకోవడం లేదని ఆయన గురువారం మీడియా ప్రతినిధులతో అన్నారు. పురంధరేశ్వరి బహిరంగ లేఖ రాయడం వెనక కాంగ్రెస్ అధిష్ఠానవర్గం కుట్ర ఉందని ఆయన విమర్శించారు. కాంగ్రెస్ పార్టీయే ఆ లేఖ రాయించిందని ఆయన అన్నారు.

కాంగ్రెస్ పార్టీకి వ్యతిరేకంగా తమ తండ్రి ఎన్టీ రామారావు తెలుగుదేశం పార్టీని స్థాపించారని, ఆ వారసత్వాన్ని తాము కొనసాగిస్తున్నామని హరికృష్ణ చెప్పారు. పురంధరేశ్వరి బహిరంగ లేఖ వెనక కాంగ్రెసు కుట్ర ఉందని తెలుగుదేశం పార్టీ నాయకుడు కోడెల శివప్రసాదరావు కూడా అన్నారు. తెలుగుదేశం పార్టీ అధ్యక్షుడు నారా చంద్రబాబునాయుడుకు మద్దతు తెలుపుతూ నందమూరి హీరోలు యువగర్జన సదస్సులో పాల్గొనడాన్ని తప్పు పడుతూ పురంధరేశ్వరి బహిరంగ లేఖ రాసిన విషయం తెలిసిందే.