స్పెషల్: చిరు కంటే బాలకృష్ణ బెటరా?

హైదరాబాద్: నిన్న బాలకృష్ణ గుంటూరు యువ గర్జనలో చేసిన ప్రసంగం బాగా ఆకట్టుకుందన్నది సర్వత్రా వ్యక్తమవుతున్న అభిప్రాయం చిరంజీవి చాలా రోజులుగా అనేక జిల్లాల్లో రోడ్ షోలలో ప్రసంగిస్తున్నా, ఆయన వెనుక ఉండి ఎంతో మంది మేధావులు ప్రసంగాలు రాసి ఇస్తున్నా, సూచనలు చేస్తున్నా చిరంజీవి ప్రసంగాలకు స్పందన అంతంతమాత్రంగా ఉంటోంది. జనం బాగానే వస్తున్నా జనం స్పందించే విధానంలో తేడా స్పష్టంగా కనిపిస్తోంది. చిరంజీవిని ఒకసారి ప్రత్యక్షంగా చూద్దామన్న ఉద్దేశంతోనే ఆ జనం వస్తున్నారన్న అభిప్రాయాన్ని రాజకీయ పరిశీలకులు వ్యక్తం చేస్తున్నారు.

రోడ్ షోలు మొదలు పెట్టినప్పటి కంటే చిరంజీవి ప్రసంగాలు ఇప్పుడు పదును తేలాయనడంలో సందేహం లేదు. అయినా ఆయన ప్రసంగాల్లో మసలా ఇంకా పెరగాల్సి ఉంది. బాలకృష్ణ నిన్నటి తొలి రాజకీయ ప్రసంగంలో నవరసాలు పలికించారు. గుంటూరు మిర్చి ఘాటు ఆయన ప్రసంగంలో విరజిమ్మింది. తన తండ్రి ఎన్టీఆర్ రాజకీయాలను, ఆయన నిజాయితీని ఎక్కువగా ప్రస్తావించిన బాలకృష్ణ నట్లు కొట్టకుండా బాగా మాట్లాడడం విశేషం.

మొత్తం సమాజం అంగీకరించని సామాజిక వర్గానికి బాలకృష్ణ ప్రాతినిధ్యం వహించడం ఆయన మైనస్ పాయింట్. మాంత్రికుడి వంటి చంద్రబాబు నాయుడుని ముఖ్యమంత్రిని చేయడానికి ఆయన ప్రయత్నించబోవడం మరో పెద్ద మైనస్ పాయింట్. అయితే వ్యక్తిగతంగా చక్కటి ప్రసంగం చేయడంలో ఆయన చిరంజీవి కంటే ఎక్కువ మార్కులు కొట్టేయడం గొప్ప విశేషం.

చిరంజీవి రాజకీయాలకు కొత్త. ఆయన స్వయం కృషితో సినిమాల్లో, ఆ తర్వాత రాజకీయాల్లో ఎదిగారు. ఆయన ఎవరికీ వారసుడు కారు. సమాజంలో అణగారిన వర్గాల ప్రతినిధిగా ఆయన ముందుకు వస్తున్నారు. అయితే ఆయన బాలకృష్ణ తరహాలో ఆవేశంగా ప్రత్యర్ధి పార్టీల మీద విమర్శలు గుప్పించాల్సిన అవసరం ఎంతైనా ఉంది.