చిరుతో పొత్తుకు దత్తాత్రేయ సంకేతాలు

మెదక్: చిరంజీవి నాయకత్వంలోని ప్రజారాజ్యంతో ఎన్నికల పొత్తు పెట్టుకునే విషయంపై భారతీయ జనతా పార్టీ (బిజెపి) రాష్ట్రాధ్యక్షుడు బండారు దత్తాత్రేయ సంకేతాలు ఇచ్చారు. ప్రజారాజ్యం పార్టీని మినహా అన్ని పార్టీలపై ఆయన శుక్రవారం విమర్శలు చేశారు. బిజెపిపై చిరంజీవి ఏ విధమైన ప్రకటన చేయలేదని ఆయన చెప్పారు. పొత్తు పెట్టుకునే విషయంపై విలేకరులు పదే పదే ప్రశ్నించగా రాజకీయాల్లో దేనికైనా సమయం రావాలని ఆయన సమాధానమిచ్చారు.

చిరంజీవి విధానాలు తమ విధానాలకు అనుగుణంగా ఉన్నాయని, ఆ విధానాలు వామపక్షాలకు భిన్నంగా ఉన్నాయని ఆయన చెప్పారు. అవినీతిపై చిరంజీవి స్పష్టంగా ఉన్నారని ఆయన అన్నారు. పరిశ్రమల విషయంలో, సామాజిక న్యాయం విషయంలో చిరంజీవి విధానాలు తమ విధానాల లాగానే ఉన్నాయని ఆయన చెప్పారు. ఈ నెల 13వ తేదీన తమ అగ్రనేత ఎల్.కె. అద్వానీ తన సంకల్పయాత్రలో తెలంగాణ బాణమే సంధిస్తారని ఆయన చెప్పారు. తెలంగాణపై తన వైఖరేమిటో చెప్పకుండా కాంగ్రెస్ అన్ని పార్టీలను విమర్శిస్తోందని ఆయన అన్నారు.