తెలంగాణపై ప్రధానితో నరేంద్ర భేటీ

న్యూఢిల్లీ: తెలంగాణపై తెలంగాణ రాష్ట్ర సమితి (ఎన్) నేత, పార్లమెంటు సభ్యుడు ఎ. నరేంద్ర శుక్రవారంనాడు ప్రధాని డాక్టర్ మన్మోహన్ సింగ్ ను కలిశారు. తెలంగాణకు అనుకులంగా ప్రకటన చేయాలని నరేంద్ర ప్రధానిని కోరారు. వీరిద్దరి మధ్య భేటీ పావు గంట సేపు సాగింది. తెలంగాణపై తాను ప్రధానితో కూలంకషంగా చర్చించానని నరేంద్ర విలేకరులతో చెప్పారు. ప్రధాని తెలంగాణకు సానుకూలంగా ప్రతిస్పందించినట్లు ఆయన తెలిపారు.

తెలంగాణపై తాము కోర్ కమిటీ సమావేశంలో చర్చించినట్లు, తెలంగాణపై ప్రభుత్వ పరంగా తాను మాట్లాడుతానని ప్రధాని తనతో చెప్పినట్లు ఆయన వివరించారు. తెలంగాణలో కాంగ్రెస్ పార్టీ బతకాలంటే తెలంగాణ రాష్ట్ర ఏర్పాటుకు అనుకూలంగా ప్రకటన చేయాలని తాను చెప్పినట్లు ఆయన తెలిపారు. తెలంగాణ పట్ల ఉన్న మనోభావాలు తెలుసునని ప్రధాని తనతో అన్నట్లు ఆయన తెలిపారు.