ప్రధాని మన్మోహన్ గల్ఫ్దేశాల పర్యటన

న్యూఢిల్లీః ప్రధానమంత్రి మన్మోహన్‌సింగ్‌ ఈ రోజు (శనివారం) గల్ప్ దేశాల్లో పర్యటించనున్నారు.ఈ పర్యటన మూడు రోజుల పాటు సాగుతుంది. ప్రపంచవ్యాప్తంగా ఆర్థిక సంక్షోభం నెలకొన్న ప్రస్తుత పరిస్థితుల్లో గల్ఫ్‌ దేశాల్లో భారీగా ఉన్న మిగులు నిధులను మన అభివృద్ధి అవసరాలకు వినియోగించుకోగల అవకాశాలు అన్వేషించవచ్చునని ప్రధాని డాక్టర్‌ మన్మోహన్‌సింగ్‌ ఈ సందర్భంగా అభిప్రాయపడ్డారు.

ప్రస్తుత ప్రపంచ ఆర్థిక రంగం తీరుతెన్నుల కారణంగా ఈ అరుదైన అవకాశం ఇండియాకు లభించిందని ఆయన చెప్పారు. ఒమన్‌, ఖతార్‌ నాయకులతో తాను చర్చలు జరిపే సమయంలో గల్ఫ్‌ ప్రాంతంలో పని చేస్తున్న భారతీయుల సంక్షేమం గురించి కూడా ప్రస్తావిస్తానని ఆయన తెలిపారు.

ఆ రెండు దేశాల్లోను భారీ సంఖ్యలో భారతీయులు పని చేస్తున్నారు, రెండు దేశాల అభివృద్ధిలోను వారి పాత్రకు బహుధా ప్రశంసలు అందుతున్నాయి అని ఆయన వ్యాఖ్యానించారు. ఇక ఇంధన రంగంలో ఉభయులకు లాభదాయకమైన వ్యూహాత్మక భాగస్వామ్యం నెలకొల్పుకోగలమన్న విశ్వాసం ఆయన ప్రకటించారు. భారత ఉపఖండం భద్రత, సుసంపన్నతల దృష్ట్యా కూడా గల్ఫ్‌ ప్రాంతానికి ప్రత్యేక ప్రాధాన్యత ఉన్నదని ఆయన తెలిపారు.