సినీ కెమెరా మన్ విఎస్సార్ స్వామి మృతి

మచిలీపట్నం: ప్రముఖ సినిమాటోగ్రాఫర్ విఎస్సార్ స్వామి మచిలీపట్నంలో కన్నుమూశారు. గుండెపోటుతో ఆయన మృతి చెందారు. మచిలీపట్నానికి ఒక పెళ్లికి హాజరు కావడానికి వచ్చారు. అక్కడే ఆయనకు గుండెపోటు వచ్చింది. ఆయన భౌతిక కాయాన్ని చెన్నై తరలించారు. స్వర్గీయ ఎన్టీ రామారావు నటించిన కథానాయకుడు సినిమాతో ఆయన తెలుగు సినీ రంగంలో సినిమా కెమెరామన్ గా రంగప్రవేశం చేశారు.

చిరంజీవి నటించిన ఖైదీ, ఇంద్ర సినిమాలకే కాకుండా బాలకృష్ణ నటించిన లక్ష్మీనరసింహ, బలేవాడివి బాస్ వంటి చిత్రాలకు ఆయన పనిచేశారు. బాపు దర్శకత్వం వహించిన భక్త కన్నప్ప సినిమాకు, విశ్వనాథ్ దర్శకత్వం వహించిన సిరిసిరిమువ్వ సినిమాకు ఆయన కెమెరామన్ గా పనిచేశారు. కృష్ణ నటించిన అల్లూరి సీతారామరాజు, మోసగాళ్లకు మోసగాడు సినిమాలకు కూడా ఆయన పనిచేశారు. అందాలరాముడు, దేవుడు చేసిన మనుషులు సినిమాలకు ఆయన సినిమాటోగ్రాఫర్ గా పనిచేశారు.