సంఘీ సలహాలు ఇచ్చారు: చిరు

హైదరాబాద్‌: వార్త దినపత్రిక అధినేత, కాంగ్రెస్ రాజ్యసభ సభ్యుడు గిరీష్ సంఘీతో ప్రజారాజ్యం అధినేత చిరంజీవి దాదాపు గురువారం రాత్రి మంతనాలు జరిపారు. వారి మధ్య రాజకీయాలపై చర్చ జరిగినట్లు సమాచారం. సతీసమేతంగా సంఘీలోని వెంకటేశ్వర దేవాలయాన్ని చిరంజీవి సందర్శించారు. చిరంజీవి, ఆయన సతీమణి సురేఖకు దేవాలయంలో పూజారులు పూర్ణకుంభంతో స్వాగతం పలికారు. పూజలు నిర్వహించిన అనంతరం ఆయన కాంగ్రెస్‌ రాజ్యసభ సభ్యుడు గిరీష్‌ సంఘీ నివాసానికి వెళ్లి ఆయనను మర్యాద పూర్వకంగా కలిశారు.

గిరీష్‌ సంఘీ చిరంజీవితో మంతనాలు జరపడంపై కాంగ్రెస్‌ ఆరా తీసింది. ఈ మధ్య గిరీష్‌సంఘీ కాంగ్రెస్‌ కార్యక్రమాలకు దాదాపు దూరంగా ఉంటున్నారు. రాత్రి 9.20 గంటలకు దేవాలయానికి వచ్చిన చిరంజీవి దంపతులు 15 నిమిషాల్లో పూజా కార్యక్రమాలు పూర్తి చేసుకుని సంఘీ నివాసంలో దాదాపు రెండు గంటలకుపైగా గడిపారు. తిరిగి వెళ్లే సమయంలో విలేకరులు చిరంజీవిని వివరాలు కోరగా, తన సతీమణి కోరిక మేరకు కార్తీక పౌర్ణమి సందర్భంగా గుడిలో పూజలు నిర్వహించేందుకు వచ్చామని తెలిపారు. గిరీష్‌ సంఘీ తనకు చిరకాల మిత్రుడని, ఆయన ఆహ్వానం మేరకు తన నివాసానికి వెళ్లినట్లు తెలిపారు. రాజకీయపరంగా ఎవరి పార్టీ వారిదే అయినా తన రాజకీయ భవిష్యత్తుకు సంబంధించి గిరీష్‌ కొన్ని సలహాలు ఇచ్చినట్లు చెప్పారు. గిరీష్‌ ఇంట్లోనే చిరంజీవి దంపతులు భోజనంచేసి బయల్దేరారు.