భూములు అమ్మలేకపోయాం: వైయస్

హైదరాబాద్: అనుకున్న మేరకు ప్రభుత్వ భూములను అమ్మలేకపోయామని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. భూముల విక్రయం ద్వారా 12 వేల కోట్ల రూపాయలను సమీకరించాలని అనుకున్నామని, అయితే 40 శాతం మాత్రమే విక్రయించగలిగామని ఆయన అన్నారు. ప్రభుత్వం పథకాలకు నిధుల కొరత ఉందని, కేంద్రం సహాయం చేయాల్సిందేనని ఆయన అన్నారు. గ్రేటర్ హైదరాబాదు పరిధిలోని ప్రజలకు రోజూ మంచినీరు అందించే పథకానికి కేంద్ర మంత్రి ఎస్. జైపాల్ రెడ్డి శుక్రవారం శ్రీకారం చుట్టారు. ఈ కార్యక్రమంలో ముఖ్యమంత్రి మాట్లాడారు.

జంటనగరాలకు రెండు దశల ద్వారా కృష్ణానది నుంచి నీటిని అందిస్తున్నామని, మూడో దశ కూడా చేపట్టాలని కొన్ని వర్గాలంటున్నాయని, అయితే కృష్ణానదిలో జంటనగరాలకు అందించడానికి నికర జలాలు లేవని ఆయన అన్నారు. గోదావరి నదిలో నికర జలాలు ఉన్నాయని, దాంతో గోదావరి జలాలను హైదరాబాదుకు తరలించే కార్యక్రమాన్ని చేపడుతున్నామని ఆయన చెప్పారు.