వంద రోజుల్లో తెలంగాణ: అద్వానీ

హైదరాబాద్: తాము అధికారానికి వచ్చిన వందరోజుల్లో తెలంగాణ ప్రత్యేక రాష్ట్రం ఏర్పాటుకు పార్లమెంటులో బిల్లు పెడతామని భాజపా అగ్రనేత, ఎన్డీయే ప్రధాని అభ్యర్థి ఎల్‌.కె.అద్వానీ ప్రకటించారు. పార్టీ ఆధ్వర్యంలో సికింద్రాబాద్‌ పరెడ్‌ గ్రౌండ్‌లో గురువారం నిర్వహించిన విజయ సంకల్ప యాత్ర ముగింపు సభకు ఆయన ముఖ్య అతిథిగా హాజరయ్యారు. ఈ సందర్భంగా భారీ జనవాహినిని ఉద్దేశించి మాట్లాడుతూ ఆ హామీ ఇచ్చారు. చాలామంది తెలంగాణ వాదులు ఢిల్లీకి వచ్చి తనను కలిసి, మీరొక్కరే ప్రత్యేక తెలంగాణ ఇవ్వగలరంటూ చెప్పారని, తాము తెలంగాణ ఇవ్వడానికి సిద్ధమే, అయితే అద్వానీ తెలంగాణ ఇవ్వగలరని అంటున్నవారు ఆ దిశగా ముందుకెళ్లేందుకు భారతీయ జనతాపార్టీని ఎందుకు బలోపేతం చేయరని వారితో తాను అనదలుచుకున్నానని ఆయన అన్నారు. ఎన్నికల్లో కమలం గుర్తుకు ఓటేస్తే తెలంగాణ ప్రత్యేక రాష్ట్రకల నెరవేరుస్తామని ఆయన చెప్పారు. భవిష్యత్‌లో ఎన్డీఏ నేతృత్వంలో ప్రభుత్వం ఏర్పడ్డ వందరోజుల్లోపే పార్లమెంటులో ప్రత్యేక తెలంగాణ రాష్ట్రం ఏర్పాటు కోసం బిల్లును ప్రవేశపెడ్తామని అన్నారు.

దేశంలో ఇప్పటికే ఉత్తరాఖండ్‌, జార్ఖండ్‌, ఛత్తీస్‌గఢ్‌ రాష్ట్రాలను ఇచ్చిన చరిత్ర ఎన్డీఏకే ఉందని గుర్తు చేశారు. 2004 ఎన్నికలకు ముందు కాంగ్రెస్‌ ప్రత్యేక తెలంగాణ ఏర్పాటుకు సిద్ధమని ప్రకటించి, తెలంగాణ రాష్ట్రసమితి(తెరాస)తో కలిసి పోటీ చేసిందని, కేంద్ర, రాష్ట్రాల్లో అధికారాన్ని చేపట్టిన తర్వాత తెలంగాణ ప్రజలను వంచించిందని అన్నారు. రాజకీయంలో అత్యంత ఇష్టమైన పదం ఏమిటని తనను మీడియా ప్రతినిధులు అడిగితే విశ్వసనీయత అని చెప్పానని, చెప్పిన మాటకు కట్టుబడడం తన నైజమని, తెలంగాణ రాష్ట్రాన్ని కచ్చితంగా ఏర్పాటు చేస్తామని అన్నారు. కాంగ్రెస్‌ తెలంగాణవాసుల పట్ల విశ్వాస ఘాతుకానికి పాల్పడిందని విమర్శించారు. కాంగ్రెస్‌ చరిత్రే విశ్వాస ఘాతుకాల చరిత్ర అని ధ్వజమెత్తారు. పేద, మధ్యతరగతి వారి కోసం కృషిచేస్తామని, సామాన్యుడి చెంత కాంగ్రెస్‌ హస్తం అని 2004 ఎన్నికలకు ముందు చెప్పిన ఆ పార్టీ ఇప్పుడు ప్రభుత్వంలో కేవలం ధనికుల కోసమే పని చేస్తోందని ఆరోపించారు. గడిచిన అయిదేళ్లలో యూపీఏ దేశానికి ఏం చేసిందో చెప్పుకునే పరిస్థితి కూడా లేదన్నారు. 2004-2009 మధ్యకాలాన్ని నమ్మక ద్రోహ కాలంగా ఆయన అభివర్ణించారు. కేవలం ఏడుసీట్ల ఆధిక్యంతో ప్రభుత్వాన్ని ఏర్పాటు చేసిన యూపీఏ అయిదేళ్లలో సామాన్యులకు చేసింది శూన్యమన్నారు.