ముందస్తు ఎన్నికలుండవు: ప్రధాని

ప్రత్యేక విమానం నుంచి: లోకసభకు ముందస్తు ఎన్నికలు జరుగుతాయనే వార్తలను ప్రధాని డాక్టర్ మన్మోహన్ సింగ్ కొట్టిపారేశారు. ప్రపంచ ఆర్థిక వ్యవస్థ సంక్షోభాన్ని ఎదుర్కుంటున్న ప్రస్తుత తరుణంలో లోకసభకు ముందస్తుగానే ఎన్నికలు జరుగుతాయనే వార్తలు వెలువడుతున్నాయి. ఆర్థిక సంక్షోభం ప్రభావం ఎన్నికలపై ఉండదని, గడువు ప్రకారమే ఎన్నికలు జరుగుతాయని ఆయన జి - 20 దేశాల సదస్సులో పాల్గొని వాషింగ్టన్ నుంచి తిరిగి వస్తున్న సమయంలో విమానంలో మీడియా ప్రతినిధులతో అన్నారు.

తమ ప్రభుత్వం చాలా బాగా పని చేసిందని, ప్రజలు తిరిగి తమపై విశ్వాసాన్ని వ్యక్తం చేస్తారని అశిస్తున్నామని ఆయన అన్నారు. ఆర్థిక సంక్షోభం తాము సృష్టించింది కాదని, ఈ సంక్షోభం విషయంలో తమ ప్రతిస్పందనను ప్రజలు అర్థం చేసుకుంటారని ఆయన అన్నారు. తగిన సమయంలో తాము చర్యలు చేపట్టామని, ప్రపంచం కొట్టుమిట్టాడుతుంటే మన పెరుగుదల రేటు 7.5 శాతం ఉండేలా చూడగలిగామని ఆయన అన్నారు.