వైయస్ ప్రకటన కంటి తుడుపే: కెసిఆర్

హైదరాబాద్: నేత కార్మికుల రుణాల మాఫీపై ముఖ్యమంత్రి డాక్టర్ వైయస్ రాజశేఖర రెడ్డి చేసిన ప్రకటన కంటి తుడుపు చర్య మాత్రమేనని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు విమర్శించారు. సొసిటీ రుణాల మాఫీ వల్ల నేత కార్మికులకు ఒరిగేదేమీ ఉండదని ఆయన సోమవారం మీడియా ప్రతినిధుల సమావేశంలో అన్నారు. ఆ రుణాల మాఫీ డబ్బులు బ్యాంకుల్లో జమ అవుతాయని, దానివల్ల నేత కార్మికులకు ఉపయోగం ఉండదని ఆయన అన్నారు. నేత కార్మికుల ప్రైవేట్ రుణాలను కూడా మాఫీ చేయాలని ఆయన ప్రభుత్వాన్ని డిమాండ్ చేశారు. అప్పులపై మారిటోరియం విధించాలని ఆయన అన్నారు. తాము ఒక నిధిని ఏర్పాటు చేశామని, దాని వల్ల నేత కార్మికులకు ఆత్మవిశ్వాసం పెరుగుతుందని, నేత కార్మికుల్లో ఆత్మవిశ్వాసం పెరగడం అవసరమని ఆయన అన్నారు.

రెండు, మూడు రోజుల్లో పార్టీ రాజకీయ వ్యవహారాల కమిటీని వేస్తున్నట్లు ఆయన తెలిపారు. మూడు నాలుగు ఉప సంఘాలను నియమిస్తామని ఆయన చెప్పారు. జిల్లా ఇంచార్జీలను ఆయన ప్రకటించారు. గ్రేటర్ హైదరాబాదుకు సుదర్శన్ రావును, మంచిర్యాలకు కొప్పుల ఈశ్వర్ ను, కరీంనగర్ కు వినోద్ కుమార్ ను, వరంగల్ కు కెప్టెన్ లక్ష్మీకాంతరావును, మెదక్ కు రాజయ్య యాదవ్ ను, నల్లగొండకు సత్యనారాయణను, రంగారెడ్డికి యాదగిరి రెడ్డిని, నిజామాబాద్ కు హరీష్ రావును, ఖమ్మంకు రవీంద్రనాయక్ ను, ఆదిలాబాద్ కు రాజేశ్వర్ ను, మహబూబ్ నగర్ కు కర్నె ప్రభాకర్ ను ఇంచార్జీలుగా నియమించారు.