సాక్షివన్నీ పెడర్థాలే: హరిరామజోగయ్య

హైదరాబాద్: సాక్షి దిన పత్రిక తన లేఖలోని అర్థాలకు పెడర్థాలు తీసిందని ప్రజారాజ్యం పార్టీ నాయకుడు చేగొండి హరిరామజోగయ్య విమర్శించారు. గాలి వుందో లేదో నాకైతే డౌటే అనే శీర్షికతో వెలువడిన వార్తను ఆయన మంగళవారం మీడియా ప్రతినిధుల సమావేశంలో ఖండించారు. తాను రాసిన లేఖలోని అర్థాలను పత్రిక వక్రీకరించిందని, వాటికి పెడర్థాలు తీసిందని ఆయన అన్నారు. తాను రాసిన లేఖ పత్రికకు ఎలా వచ్చిందో అర్థం కావడం లేదని ఆయన అన్నారు. లేఖలను ప్రభుత్వం దొంగిలిస్తోందని ఆయన విమర్శించారు. రాజకీయ లబ్ధి కోస మాత్రమే సాక్షి పత్రిక ఆ వార్త రాసిందని ఆయన అన్నారు. తనకు గానీ, సీనియర్లకు ప్రజారాజ్యం పార్టీ తీరుపై అసంతృప్తి ఉందనే మాటలో కూడా నిజం లేదని ఆయన అన్నారు.

తన లేఖలో పార్టీపై, పార్టీ నాయకుడిపై ఏ విధమైన ఆసంతృప్తి లేదని ఆయన స్పష్టం చేశారు. తాను చిరంజీవికి వంద ఉత్తరాలు రాసి ఉంటానని ఆయన చెప్పారు. తనకూ చిరంజీవికీ మధ్య ఉన్న సంబధం తండ్రీకీడుకుల వంటి అనుబంధమని, తాను చిరంజీవికి సలహాలు ఇస్తూనే ఉంటానని ఆని ఆయన అన్నారు. తాను చిరంజీవిని, పార్టీని విమర్శించే పరిస్థితి రాదని ఆయన అన్నారు. పోన్లనే కాదు, ఫ్యాక్స్ ను కూడా ట్యాపింగ్ చేస్తున్నారని, దీనిపై సిబిఐ విచారణ జరిపించాలని ఆయన అన్నారు.