శాసనసభకు రాజీనామా చేస్తా: బాబు

హైదరాబాద్: హైదరాబాదులోని సంతోష్ నగర్ లో పోలీసులపై వికారుద్దీన్ అనే సిమీ కార్యకర్త కాల్పుల ఘటన గురువారం శాసనసభను కుదిపేసింది. అధికార కాంగ్రెస్, ప్రతిపక్షాల సభ్యుల మధ్య తీవ్ర వాగ్వివాదం జరిగింది. రాష్ట్రంలో శాంతిభద్రతల పరిస్థితిపై ప్రతిపక్షాలు ప్రభుత్వంపై విమర్శలను కురిపించారు. ఒకానొక సందర్భంలో తాను శాసనసభ సభ్యత్వానికి రాజీనామా చేస్తానని ప్రతిపక్ష నాయకుడు నారా చంద్రబాబు నాయుడు సవాల్ చేశారు. ఆదిలాబాద్ జిల్లా భైంసాలో పోలీసులు జరిపిన కాల్పుల్లోనే ఇద్దరు వ్యక్తులు మరణించారని నిరూపించకపోతే తాను శాసనసభా సభ్యత్వానికి రాజీనామా చేస్తానని ఆయన అన్నారు.

ఆక్టోపస్ ను ప్రభుత్వం నిర్వీర్యం చేసిందని ఆయన విమర్శించారు. శాంతిభద్రతల పరిరక్షణలో ప్రభుత్వం పూర్తిగా విఫలమైందని ఆయన విమర్శించారు. ఆదిలాబాద్ జిల్లా భైంసా దాడుల కేసు దర్యాప్తు పై ప్రభుత్వం పూర్తిగా నిర్లక్ష్యం వహించిందని ఆయన విమర్శించారు. హైదరాబాదు జంట పేలుళ్ల కేసును ఛేదించడంలో ప్రభుత్వం పూర్తిగా విఫలమైందని ఆయన అన్నారు. హోంమంత్రి కె. జానారెడ్డి అసమర్థుడని ఆయన తప్పు పట్టారు. ముఖ్యమంత్రిగా వైయస్ రాజశేఖర రెడ్డి తగరని ఆయన అన్నారు. రాష్ట్రంలో ఉగ్రవాద దాడుల కేసుల దర్యాప్తులు ముందుకు సాగడం లేదని, ప్రభుత్వం వాటి పట్ల ఏ మాత్రం శ్రద్ధ చూపడం లేదని ఆయన అన్నారు.