మజ్లీస్ తో స్నేహమే ముఖ్యం: దత్తాత్రేయ

హైదరాబాద్: ప్రజల ప్రాణాల కన్నా కాంగ్రెసుకు మజ్లీస్ స్నేహమే ముఖ్యమని భారతీయ జనతా పార్టీ (బిజెపి) రాష్ట్రాధ్యక్షుడు బండారు దత్తాత్రేయ వ్యాఖ్యానించారు. మజ్లీస్ తో స్నేహం చేస్తూ కాంగ్రెసు పార్టీ తీవ్రవాదాన్ని ప్రోత్సహిస్తోందని ఆయన గురువారం మీడియా ప్రతినిధులతో అన్నారు. హైదరాబాదులో ఉగ్రవాద ప్రసక్తి వచ్చినప్పుడల్లా మజ్లీస్ ఉలిక్కి పడుతోందని ఆయన అన్నారు. పోలీసులపై కాల్పులు జరిపిన వికారుద్దీన్ ను మజ్లీస్ పార్టీ సమర్థిస్తోందని ఆయన ఆరోపించారు. హైదరాబాదు మజ్లీస్ గుత్త సొత్తు కాదని ఆయన అన్నారు.

హైదరాబాదు ఉగ్రవాదులకు అడ్డాగా మారుతోందని తాము చెబుతూ వస్తున్నామని, అయినా ప్రభుత్వం పట్టించుకోవడం లేదని ఆయన అన్నారు. తామే కాదు కేంద్ర ప్రభుత్వం కూడా ఆ విషయమే చెబుతోందని, దేశంలో ఎక్కడ ఉగ్రవాద చర్యలు జరిగినా హైదరాబాదులోనే మూలాలు ఉన్నట్లు బయటపడుతోందని ఆయన అన్నారు. వికారుద్దీన్ లాంటి వారికి వత్తాసు పలికే పరిస్థితి మజ్లీస్ కు ఎందుకు వచ్చిందని ఆయన విమర్శించారు.