వైయస్ కు గుండు గొరగండి:కేసీఆర్‌

హైదరాబాద్:ముఖ్యమంత్రి గుండు గొరగాలని టీఆర్‌ఎస్‌ అధినేత కేసీఆర్‌ నాయీ బ్రా హ్మణులకు పిలుపునిచ్చారు. గుండు గొరిగి చెట్ల మందుతో బొట్లు పెడితే ఆయన రోగం కుదురుతుందన్నారు. రిలయెన్స్‌ ఫ్రెష్‌, రిలయెన్స్‌ హెయిర్‌ కటింగ్‌ సెలూన్స్‌, బ్యూటీపార్లర్లు.. తదితరాలను ప్రోత్సహించి చేతివృత్తిదారుల బతుకులను రోడ్డుపాలు చేస్తున్న వైయస్ కు బుద్ది చెప్పాలని ఆయన అన్నారు. హెయిర్‌ కటింగ్‌ సెలూన్లు సామూహిక కేంద్రాలని, వాటిద్వారా ప్రజలను చైతన్యవంతులను చేయాలని ఆయన కోరారు. తెలంగాణలోని దేవాలయాల్లో నాయీ బ్రాహ్మణులు మాత్రమే నాదస్వరం వాయించేలా చర్యలు తీసుకుంటామన్నారు.

గ్రేటర్‌ హైదరాబాద్‌ యువజన విభాగం అధ్యక్షుడు కేపీ వివేకానంద ఆధ్వర్యంలో సుమారు 500 మంది అనుచరులతో నాయీ బ్రాహ్మణ సంఘ కార్యదర్శి ఉప్పల భీంరావు మంగళవారం టీఆర్‌ఎస్‌లో చేరారు. తెలంగాణ భవన్లో గులాబీ కండువా కప్పి వారిని కేసీఆర్‌ పార్టీలోకి ఆహ్వానించారు. తెలంగాణ రాష్ట్రంలో బీసీలకు దామాషా పద్ధతిలో బడ్జెట్‌లో 50 శాతం నిధులు కేటాయిస్తామని చెప్పారు. నాయీ బ్రాహ్మణులకు పావలా వడ్డీకే లక్ష రూపాయల రుణం ఇస్తామని, హెయిర్‌ కటింగ్‌ సెలూన్లకు విద్యుత్‌ను కమర్షియల్‌ నుంచి నివాసిత ప్రాంతాల కేటగిరీలోకి మారుస్తామని హామీ ఇచ్చారు.