మహేష్ ప్రచారం చేయడు: కృష్ణ

చెన్నై: వచ్చే అసెంబ్లీ ఎన్నికల్లో తన కుమారుడు, హీరో మహేష్‌బాబు కాంగ్రెస్‌ పార్టీ తరఫున ప్రచారం చేయడని పద్మభూషణ్‌ కృష్ణ తెలిపారు. అయితే తమ మద్దతు మాత్రం కాంగ్రెస్‌ పార్టీకి పూర్తిగా ఉంటుందని తెలిపారు.చెన్నైలో ఆదివారం సాయంత్రం అఖిల భారత తెలుగు సమాఖ్య ఏర్పాటు చేసిన సన్మాన కార్యక్రమంలో ఆయన పాల్గొన్నారు. ఈ సందర్భంగా ఆయన విలేకరులతో మాట్లాడారు. తాను గతంలో ప్రత్యక్ష రాజకీయాల్లో ఉన్నా కొంత విరామం వచ్చిందన్నారు. అయితే తిరిగి ప్రత్యక్ష రాజకీయాల్లోకి వచ్చేదీ లేనిదీ ఇప్పుడే చెప్పలేనని అన్నారు. ఎన్నికల్లో పోటీ చేసే విషయంపై కూడా ఇంకా తేల్చుకోలేదని చెప్పారు. కాంగ్రెస్‌ తరఫున ప్రచారం చేస్తారా అని ప్రశ్నించగా, ఇంకా ఏ నిర్ణయం తీసుకోలేదన్నారు.

అత్యధిక సినిమాలకు దర్శకత్వం వహించిన మహిళా దర్శకురాలుగా ప్రపంచరికార్డు సృష్టించిన తనకు పద్మశ్రీ అవార్డు రాలేదన్న అసంతృప్తి లేదని, వాస్తవానికి కృష్ణకే ఇంత ఆలస్యంగా అవార్డు వచ్చినప్పుడు, నాకు ఇంకా ఆలస్యంగా రావడమే న్యాయమని కృష్ణ సతీమణి విజయనిర్మల అన్నారు. పద్మభూషణ్‌ పురస్కారం ప్రకటించిన తరువాత తొలిసారిగా చెన్నైకి వచ్చిన కృష్ణకు ఇక్కడ తెలుగువారు, ఆయన అభిమానులు, చిత్ర పరిశ్రమకు చెందిన వారు ఘనంగా సత్కరించారు.