సత్యం పాపం వైఎస్ దే: అద్వానీ

న్యూఢిల్లీ: "ఓ సత్యం.. ఓ మేటాస్‌.. అంతేనా.. ఓ సాక్షి.. ఓ టీవీ చానల్‌..ఇది కార్పొరేట్‌ మోసమూ కాదు. కార్పొరేట్‌ కుంభకోణమూ కాదు. ఇది ప్రభుత్వ కుంభకోణం. ఆశ చూపిస్తూ పెద్దఎత్తున భూములు, భారీఎత్తున ప్రభుత్వ కాంట్రాక్టులు అప్పగించకుండా..ఆంధ్రప్రదేశ్‌లో అధికారంలో ఉన్న ప్రభుత్వ పెద్దల పాత్ర లేకుండా ఇంత పెద్ద కుంభకోణం జరగడం అసాధ్యం. దేశంలోనే అతిపెద్ద కార్పొరేట్‌ కుంభకోణమైన దీనిపై సీబీఐ విచారణ సరిపోదు. నిజాలు వెలుగులోకి రావాలంటే న్యాయ విచారణ అవసరం" అని బీజేపీ నేత ఎల్‌కే అద్వానీ డిమాండ్‌ చేశారు.

దేశ రాజధానిలో గురువారం జరిగిన ఫిక్కీ వార్షిక సర్వసభ్య సమావేశంలో ఆయన మాట్లాడారు. సత్యం, మేటాస్‌ కుంభకోణంతో కార్పొరేట్‌ ప్రపంచంపై మాయని మచ్చ పడిందని చెప్పారు. మరోపక్క...అసెంబ్లీలో చాప చుట్టేసిన సత్యం కుంభకోణం పార్లమెంటులో ప్రతిధ్వనించనుంది. ప్రపంచవ్యాప్తంగా సంచలనం సృష్టించిన రూ.7800 కోట్ల ఈ కుంభకోణంపై శుక్రవారం పార్లమెంటులో చర్చ జరగనుంది.