సోనియాకు దోసిపెడుతున్న వైఎస్: రోజా

హైదరాబాద్: ముఖ్యమంత్రి రాజశేఖరరెడ్డి అవినీతి సొమ్ముకు కాంగ్రెస్‌ అధిష్టానం జీ హుకుం అంటోందని, దేశంలోని కాంగ్రెస్‌ సీఎంలందరికీ ఈ విషయంలో ఆయన ఆదర్శనీయుడుగా మారారని తెలుగు మహిళ అధ్యక్షురాలు రోజా విమర్శించారు. శుక్రవారం ఆమె ఎన్టీఆర్‌ భవన్‌లో విలేఖరులతో మాట్లాడారు. 'గతంలో తెలంగాణ అంశాన్ని పార్టీ అధ్యక్షురాలు సోనియా గాంధీకి వదిలిపెట్టామని, నిర్ణయం ఆమె తీసుకొంటుందని ముఖ్యమంత్రి సహా అందరూ అనేవారు.

ఇప్పుడు ఆ అంశాన్ని సోనియా గాంధీ ముఖ్యమంత్రికి అప్పగించారని, నిర్ణయం ఆయనే తీసుకొంటారని వారే చెబుతున్నారు. అవినీతి సొమ్ము ప్రభావం వల్లే ఈ మార్పు. రానున్న ఎన్నికల్లో డబ్బు అవసరాల కోసం ఆమె కూడా ఈ ముఖ్యమంత్రిపై ఆధారపడటం వల్లే ఈ పరిస్ధితి' అని రోజా వ్యాఖ్యానించారు.