సత్యం రాజును ప్రశ్నించనున్న ఐటి

హైదరాబాద్: సత్యం కంప్యూటర్స్ మాజీ చైర్మన్ రామలింగరాజును ఆదాయం పన్ను శాఖ అధికారులు ఈ నెల 21వ తేదీన ప్రశ్నించనున్నారు. రామలింగరాజును ప్రశ్నించేందుకు మూడు రోజుల అనుమతి కోరుతూ ఆదాయం పన్నుశాఖ కోర్టులో పిటిషన్ దాఖలు చేసింది. దీనిపై విచారించిన కోర్టు ఒక రోజు విచారణకు అనుమతిస్తూ ఆదేశాలు ఇచ్చింది. ప్రత్యేకంగా నియమించిన న్యాయవాది సమక్షంలో రామలింగరాజును ప్రశ్నించాలని కోర్టు ఆదాయం పన్ను శాఖను ఆదేశించింది.

ఇదిలా వుంటే, రామలింగరాజు బెయిల్ పిటిషన్ ను నాంపల్లి కోర్టు బుధవారం తోసిపుచ్చింది. రామలింగరాజు సోదరుడు, వడ్లమానిల బెయిల్ పిటిషన్లను కూడా కోర్టు తోసిపుచ్చింది. కాగా, సత్యం కంప్యూటర్స్ వ్యవహారాన్ని సిబిఐ విచారణకు స్వీకరించింది. సత్యం కంప్యూటర్స్ వ్యవహారంపై రేపు (గురువారం) లోకసభలో చర్చ జరగనుంది. స్వల్ప వ్యవధి చర్చకు స్పీకర్ అనుమతించారు.