మంత్రి రేణుకా చౌదరికి చిక్కులు

మంగళూరు: మంగళూరు పబ్‌ ఘటనపై 'తాలిబనీకరణ' వ్యాఖ్యలు చేసిన కేంద్ర మంత్రి రేణుకా చౌదరిని చిక్కులు చుట్టుముడుతున్నాయి. క్రిమినల్‌ కేసులు నమోదైనందున రేణుకా చౌదరి మంత్రి వర్గంలో కొనసాగే నైతికహక్కును స్థానిక న్యాయనిపుణులు ప్రశ్నిస్తున్నారు. ఆమెను అనర్హురాలిగా ప్రకటించాలంటూ ఎన్నికల కమిషన్‌ను ఆశ్రయించేందుకు సన్నాహాలు జరుగుతున్నాయి.

మంగళూరులో తాలిబనీకరణ సాగుతోందన్న రేణుక వ్యాఖ్యలు మంగళూరు ప్రజల మనోభావాల్ని దెబ్బతీసేవిగా ఉన్నాయంటూ నగర మేయరు గణేష్‌ హొసబెట్టు, మరో 15 మంది దాఖలు చేసిన కేసు సరికొత్త మలుపుతిరిగింది. కేసులకు సంబంధించి ఎఫ్‌ఐఆర్‌ను దాఖలు చేయాల్సిందిగా మంగళూరులోని మూడవ జె.ఎం.ఎఫ్‌.సి.న్యాయమూర్తి పోలీసుల్ని ఆదేశించారు. దర్యాప్తు నివేదికను మార్చి 20 లోగా సమర్పించాల్సిందిగా సూచించారు. ఆమెకు వ్యతిరేకంగా మంగళూరు కోర్టులో ఐపిసి 153ఎ, 153బి, 505 సెక్షన్ల కింద కేసులు నమోదయ్యాయి.