జూ.ఎన్టీఆర్ కు టిడిపి తీర్థం

హైదరాబాద్: ప్రముఖ సినీ నటుడు జూ.ఎన్టీఆర్ ఈ నెల 27వ తేదీన తెలుగుదేశం పార్టీ తీర్థం పుచ్చుకోనున్నారు. ఆయనతో పాటు మరో నందమూరి హీరో కళ్యాణ్ రామ్ కూడా ఆయనతో పాటు తెలుగుదేశం పార్టీలో చేరుతారు. తాను ఇచ్చిన హామీలను అన్నింటినీ తెలుగుదేశం పార్టీ అధ్యక్షుడు నారా చంద్రబాబు నాయుడుతో చెప్పి అమలు చేయిస్తానని బాలకృష్ణ సభల్లో చెప్పడంపై కాంగ్రెసు పార్టీ విమర్శలు గుప్పించింది. పార్టీ సభ్యుడు కూడా కాని బాలకృష్ణ ఎలా అమలు చేయిస్తారని ప్రశ్నించింది.

బాలయ్యపై వచ్చిన విమర్శల నేపథ్యంలో జూనియర్ ఎన్టీఆర్, కళ్యాణ్ రామ్ తెలుగుదేశం పార్టీలో చేరిన తర్వాతనే పార్టీ ప్రచారానికి శ్రీకారం చుట్టాలని అనుకుంటున్నారు. అందులో భాగంగానే ఈ నెల 27వ తేదీన వారు లాంఛనంగా పార్టీ తీర్థం పుచ్చుకుంటారు. మార్చి రెండో వారంలో జూనియర్ ఎన్టీఆర్ రోడ్ షోలు నిర్వహించే అవకాశం ఉంది. వారితో పాటు బాలయ్య కూడా తెలుగుదేశం పార్టీ అధికారికంగా చేరుతారని భావిస్తున్నారు.