సినీ నటి నిర్మలమ్మ కన్నుమూత

హైదరాబాద్: ప్రముఖ సినీ నటి నిర్మలమ్మ గురువారం ఉదయం కన్నుమూశారు. ఆమెకు 89 ఏళ్లు. ఆమె గురువారం ఉదయం ఐదున్నర గంటల ప్రాంతంలో హైదరాబాదులోని తన ఇంటిలో సహజ మరణం చెందారు. సినీ పరిశ్రమ ఆమె మృతికి సంతాపం ప్రకటించారు. ఇంటిలో మనువడు, మనవరాలు మాత్రమే ఉంటారు. ఆమె నిద్రలోనే కన్నుమూశారు. ఈ విషయం తెలిసి సన్నిహితులు ఇంటికి వచ్చారు. ఆమె దత్తపుత్రిక కవిత, అల్లుడు చెన్నై నుంచి రావాల్సి ఉంది.

నిర్మలమ్మ అమ్మ పాత్రలకు పెట్టింది పేరుగా నిలిచారు. ఆమె వేయికి పైగా చిత్రాల్లో నటించారు. అందురు హీరోలు, హీరోయిన్లు నటించిన చిత్రాల్లో క్యారెక్టర్ యాక్టరుగా నటించారు. ఆమె మొదటి సినిమా గరుడ భంగం కాగా చివరి సినిమా ప్రేమకు స్వాగతం. ఆమె స్వస్థలం కృష్ణా జిల్లా మచిలీపట్నం. మొదట్లో ఆమె నాటకాల్లో నటించారు. ఆమె నాటకాల్లో నటనకు విశేష ఆదరణ లభించింది.

నిర్మలమ్మ మృతితో సినిమా రంగం పెద్ద దిక్కు కోల్పోయిందని ప్రజారాజ్యం అధినేత, ప్రముఖ నటుడు చిరంజీవి అన్నారు. నిర్మలమ్మతో తనకు గల అనుబంధాన్ని ప్రముఖ నటుడు అక్కినేని నాగేశ్వరరావు నెమరేసుకున్నారు. తమది దాదాపు 40 ఏళ్ల పరిచయమని ఆయన అన్నారు. మంత్రి ఆనం నారాయణ రెడ్డి ఆమె మృతికి సంతాపం ప్రకటించారు.