జగన్ తోనే మీడియా వార్: వేమూరి

హైదరాబాద్: రాష్ట్రంలో మీడియా వార్ ను ప్రారంభించింది సాక్షి దిన పత్రిక అధిపతి, ముఖ్యమంత్రి డాక్టర్ వైయస్ రాజశేఖర రెడ్డి కుమారుడు వైయస్ జగన్మోహన్ రెడ్డియేనని ఆంధ్రజ్యోతి దినపత్రిక మేనేజింగ్ డైరెక్టర్ వేమూరి రాధాకృష్ణ అన్నారు. వైయస్ జగన్ గురువారం చేసిన ఆరోపణలకు ఆయన శుక్రవారం సమాధానమిచ్చారు. సాక్షి దినపత్రికను మూసివేయించడానికి కుట్ర జరుగుతోందనే జగన్ ఆరోపణలు పచ్చి అబద్ధమని ఆయన అన్నారు.

ఆంధ్రజ్యోతి దినపత్రికను మూసివేయించడానికే ముఖ్యమంత్రి వైయస్ రాజశేఖర రెడ్డి ప్రయత్నిస్తున్నారని ఆయన అన్నారు. సాక్షిని తాము పత్రికగా గుర్తించడం లేదని ఆయన అన్నారు. తండ్రి వైయస్ అక్రమాలను కప్పిపుచ్చడానికే జగన్ సాక్షి పత్రికను ప్రారంభించారని ఆయన అన్నారు. తగిన సాక్ష్యాధారాలతోనే తాము ఆంధ్రజ్యోతిలో వార్తలు రాస్తున్నట్లు ఆయన తెలిపారు. వైయస్ ప్రభుత్వ అవినీతిపై ఆంధ్రజ్యోతి, ఈనాడు దినపత్రికలు పెద్ద యెత్తున వార్తాకథనాలు ప్రచురిస్తున్నాయి.