ముడుపులకే జలయజ్ఞం: చిరు

రాజమండ్రి: ముడుపుల కోసమే ముఖ్యమంత్రి డాక్టర్ వైయస్ రాజశేఖర రెడ్డి ప్రభుత్వం జలయజ్ఞం చేపట్టిందని ప్రజారాజ్యం అధినేత చిరంజీవి విమర్శించారు. ముడుపులు ఎక్కడ వస్తాయో చూసి అక్కడే ప్రభుత్వం పెద్దలు పని చేస్తూ వస్తున్నారని ఆయన అన్నారు. తూర్పు గోదావరి జిల్లాలో ఆయన గురువారంనాడు పర్యటించారు. ప్రజలకు ఏది అవసరం, ఏది అనవసరం అనే ఇంగితం ప్రభుత్వానికి లేదని ఆయన అన్నారు. ప్రజల అవసరాలు వారికి పట్టవని, భవిష్యత్తుపై ఆలోచన లేదని ఆయన అన్నారు. ప్రభుత్వం 90 ప్రాజెక్టులు చేపట్టిందని, అవి ఎప్పుడు పూర్తవుతాయో కూడా తెలియని స్థితి అని ఆయన అన్నారు.

తాము ప్రాజెక్టులకు వ్యతిరేకం కాదని, అయితే ప్రజల తక్షణ అవసరాలు కూడా చూడాలని, ప్రాజెక్టులు పూర్తవుతాయా లేదా కూడా చేయాలని ఆయన అన్నారు. రైతు రాజ్యం, పేదల ప్రభుత్వం అని చెప్పుకుంటున్న వారు వారి కోసం చేసిందేమీ లేదని ఆయన అన్నారు. ప్రజలను ఏమార్చి రాజకీయ నాయకులు పబ్బం గడుపుకుంటున్నారని ఆయన అన్నారు. అధికార దుర్వినియోగానికి పాల్పడుతూ ప్రజలను మోసం చేస్తున్నారని ఆయన అన్నారు. తన జీవితం ప్రజలకే అంకితమని ఆయన అన్నారు. ప్రజలు తమ భవిష్యత్తును తన చేతుల్లో పెట్టారని, వారి కోసమే జీవితాన్ని అంకితం చేస్తానని ఆయన అన్నారు.