కెసిఆర్ కు బిజెపి నేతల ఫోన్

న్యూఢిల్లీ: తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావుకు గాలం వేయడానికి భారతీయ జనతా పార్టీ (బిజెపి) నేతలు అప్పుడే ప్రయత్నాలు మొదలు పెట్టారు. కెసిఆర్ కు బిజెపి నాయకుడు బల్వీందర్ సింగ్ శనివారం ఫోన్ చేశారు. ఆదివారంనాడు పంజాబ్ లోని లూథియానాలో జరిగే ర్యాలీకి రావాల్సిందిగా ఆయన కెసిఆర్ ను ఆహ్వానించారు.

కాగా, తాము కాంగ్రెసు పార్టీకి మద్దతిచ్చే ప్రసక్తే లేదని తెరాస నాయకుడు వినోద్ కుమార్ స్పష్టం చేశారు. మహాకూటమితో పొత్తు రాష్ట్రానికే పరిమితమని ఆయన శనివారం మీడియా ప్రతినిధులతో అన్నారు. కేంద్రంలో తాము ఏ పార్టీతోనైనా కలిసి పనిచేయడానికి సిద్ధంగా ఉన్నామని, అయితే తెలంగాణ రాష్ట్రం ఇచ్చే పార్టీని తాము కేంద్రంలో బలపరుస్తామని ఆయన చెప్పారు. అయితే ఏ నిర్ణయమైనా ఈ నెల 16వ తేదీన ఫలితాలు వెలువడిన తర్వాత పార్టీల బలాబలాలను బట్టి నిర్ణయం తీసుకుంటామని ఆయన చెప్పారు.