బిజెపి నేతలకు ఢిల్లీ పిలుపు

న్యూఢిల్లీ: ఎగ్జిట్‌పోల్స్‌ ఫలితాలు అనిశ్చిత స్థితిని సూచిస్తూ ఉండటంతో భవిష్యత్‌ కార్యాచరణపై భారతీయ జనతా పార్టీ (బిజెపి) దృష్టి పెట్టింది. కొత్త మిత్రులను వెతుక్కునే పనిలో పడింది. హంగ్ వస్తే ఏం చేయాలన్న విషయాలపై చర్చించేందుకు దేశవ్యాప్తంగా ఎన్నికల ప్రచారంలో పాల్గొన్న అగ్రనేతలను, పలువురు రాష్ట్ర నేతలను గురువారం ఢిల్లీ రావాలని ఆదేశాలు ఇచ్చింది. ప్రభుత్వ ఏర్పాట్లపై బిజెపి నేతలు చర్చించునున్నారు.గుజరాత్ ముఖ్యమంత్రి నరేంద్ర మోడి ఢిల్లీకి బయలుదేరారు.

కొత్త మిత్రులను వెతికే పనిలో ఇప్పటికే బిజెపి పడింది. తెలంగాణ రాష్ట్ర సమితి (తెరాస) ఎన్డీయెలో చేరిన నేపథ్యంలో మరిన్ని ప్రాంతీయ పార్టీలను తన వైపు లాక్కునేందుకు వ్యూహాన్ని సిద్ధం చేసి అమలు చేస్తోంది. తెలుగుదేశం పార్టీని, ప్రజారాజ్యం పార్టీని కూడా బిజెపి దువ్వుతోంది. ఏం చేయాలో, ఏం చేస్తో మంచిదో తెలుగుదేశం పార్టీ అధ్యక్షుడు నారా చంద్రబాబునాయుడికి, ప్రజారాజ్యం పార్టీ అధ్యక్షుడు చిరంజీవికి తెలుసునని బిజెపి సీనియర్ నేత ఎం. వెంకయ్యనాయుడు వ్యాఖ్యానించారు.

కాగా, బిఎస్పీ నేత మాయావతిని కూడా చేరదీసేందుకు బిజెపి ప్రయత్నాలు మొదలు పెట్టింది. మాయావతితో మంతనాలు జరిపేందుకు అరుణ్ జైట్లీని నియోగించింది. మరో వైపు అన్నాడియంకె నేత జయలలితను కూడా దగ్గర చేసుకునే ప్రయత్నాలు చేస్తోంది. ఈ ప్రయత్నాలు సాగిస్తూ ఎప్పటికప్పుడు సమీక్షించుకునేందుకు తన అగ్రనేతలను బిజెపి ఢిల్లీకి అహ్వానించినట్లు సమాచారం.