25న ప్రకాష్ రాజ్ విడాకుల కేసు

చెన్నై: భార్య నుంచి విడాకులు కోరుతూ చెన్నై ఫ్యామిలీ కోర్టులో ప్రముఖ నటుడు ప్రకాష్‌ రాజ్‌ పిటిషన్‌ దాఖలు చేశారు. 'డ్యూయెట్‌' చిత్రం ద్వారా కోలీవుడ్‌కి పరిచయమైన నటుడు ప్రకాష్‌ రాజ్‌. పలు భాషా చిత్రాల్లో నటించడంతో పాటు తమిళం, తెలుగు, కన్నడ భాషల్లో పలు సినిమాలు నిర్మించారు. సీనియర్‌ నటుడు ఆనందన్‌ చిన్నకుమార్తె, నటి లలితాకుమారిని ఆయన ప్రేమించి పెళ్లి చేసుకున్నాడు.

కొన్నేళ్ల తర్వాత ఇరువురి మధ్య భేదాభిప్రాయాలు వచ్చి విడిపోయారు. ఆ దంపతులను కలిపేందుకు చిత్రసీమకి చెందిన పలువురు ప్రముఖులు ప్రయత్నించారు. అయితే ఆ ప్రయత్నాలు ఫలించలేదు. ఈ నేపథ్యంలో భార్య నుంచి విడాకులు కోరుతూ చెన్నైలోని కుటుంబ న్యాయస్థానంలో ప్రకాష్‌ రాజ్‌ పిటిషన్‌ దాఖలు చేశారు. ఇది మంగళవారం విచారణకు రావడంతో న్యాయమూర్తి రామలింగం ఎదుట ప్రకాష్‌ రాజ్‌, లలిత కుమారి హాజరయ్యారు. పిటిషన్‌ విచారణ 25కి వాయిదా పడింది.