విజయశాంతికి చేదు అనుభవం

సంగారెడ్డి‌: తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతికి, శాసనసభ్యుడు హరీష్ రావుకు మెదక్ జిల్లా సంగారెడ్డిలో శనివారం చేదు అనుభవం ఎదురైంది. వారిద్దరి మీడియా సమావేశాన్ని అడ్డుకోవడానికి తెరాస అసమ్మతివాదులు ప్రయత్నించారు. ఎన్నికల్లో పార్టీ టికెట్ల విషయంలో నాయకత్వం అనుసరించిన పద్ధతిని తప్పు పడుతూ వారిని నిలదీసేందుకు ప్రయత్నించారు.

మాజీ ఎమ్మెల్సీ సత్యనారాయణ నాయకత్వంలో తెరాస కార్యకర్తలు కొంత మంది విజయశాంతి, హరీష్ రావులకు ప్రశ్నల వర్షం కురిపించారు. నవాజ్ రెడ్డికి టిక్కెట్ ఇవ్వడాన్ని వారు నిరసించారు. పార్టీ టిక్కెట్ల పంపకంలో పార్టీ నాయకత్వం అనుసరించిన వద్ధతి వల్లనే పార్టీ ఓడిపోయిందని వారన్నారు. మీడియా ప్రతినిధుల సమావేశంలో విజయశాంతి, హరీష్ రావు ముక్తసరిగా మాట్లాడి వెళ్లిపోయారు. మాజీ శాసనసభ్యుడు దుబ్బాక రామలింగారెడ్డి తదితరులు నచ్చజెప్పడానికి ప్రయత్నించినా అసమ్మతి వాదులు వినలేదు. విజయశాంతి, హరీష్ రావు వెళ్లిపోగానే గొడవ సద్దమణగింది.