మీడియాపై డిఎస్ రుసరుసలు

హైదరాబాద్: కాంగ్రెసు పార్టీలో గొడవలు మీడియా సృష్టేనని ప్రదేశ్ కాంగ్రెసు కమిటీ అధ్యక్షుడు డి.శ్రీనివాస్ వ్యాఖ్యానించారు. తన సమావేశాల సందర్భంగా జిల్లాల్లో పార్టీ వర్గాల మధ్య ఘర్షణలు చెలరేతున్నాయంటూ మీడియా వార్తలు రాస్తోందని, అది నిజం కాదని ఆయన శనివారం మీడియా ప్రతినిధుల సమావేశంలో అన్నారు. మీడియా అత్యుత్సాహం ప్రదర్శిస్తోందని ఆయన అన్నారు.

నిర్మల్ లో నిజంగానే గొడవ జరిగిందని, మిగతా చోట్ల గొడవలు లేవని, ఓడిపోయామనే బాథతో కొంత మంది మాట్లాడుతున్నారని, దాన్నే ఘర్షణలుగా చిత్రీకరిస్తోందని ఆయన అన్నారు. కొంత మంది పార్టీలో అత్యుత్సాహం ప్రదర్శిస్తుంటారని, మీడియాలో కొంత మంది అలాగే ప్రవర్తిస్తున్నారు కదా అని ఆయన అన్నారు. తాను జిల్లాల్లో సమీక్షలు జరపడం లేదని, ఓట్ల శాతం ఎందుకు తక్కువగా వచ్చిందనే విషయంపై కింది స్థాయిలో సమీక్ష జరపాలనే సందేశాన్ని మాత్రమే వినిపిస్తున్నానని ఆయన చెప్పారు.