రాజమండ్రి జైలుకు రామారావు

గుంటూరు: గుంటూరు ఆస్పత్రిలో చికిత్స పొందుతున్న తెలుగుదేశం శాసనసభ్యుడు టీవీ రామారావును రాజమండ్రి జైలుకు తరలిస్తున్నారు. గుండె నొప్పి రావడంతో ఆయనను సోమవారం రాత్రి గుంటూరు ఆస్పత్రిలో చేర్చారు. అయితే రామారావుకు రక్తంపోటు మాత్రమే ఉందని, గుండె జబ్బు లేదని వైద్యులు తేల్చారు. అయితే తనకు మళ్లీ గుండె నొప్పి వచ్చిందని రామారావు ఫిర్యాదు చేశారు. దాంతో వైద్యులు ఆయనకు ఇసిజి పరీక్షలు నిర్వహించారు. రామారావు ఆరోగ్యం నిలకడగానే ఉందని, ఆయనను డిశ్చార్జి చేస్తామని వైద్యులు చెబుతున్నారు. దీంతో డిశ్చార్జి అయిన వెంటనే ఆయనను రాజమండ్రి జైలుకు తరలించడానికి ఏర్పాట్లు చేశారు.

గుండె నొప్పి వచ్చిందని చెప్పడంతో రామారావును హైదరాబాదులోని నిమ్స్ అస్పత్రికి తరలించాలని గుంటూరు ఆస్పత్రి వైద్యులు మొదట భావించారు. అయితే పరీక్షలు నిర్వహించిన అనంతరం హైదరాబాదుకు తరలించాల్సిన అవసరం లేదని ఆస్పత్రి సూపరింటిండెంట్ చెప్పారు. దీనిపై తెలుగుదేశం పార్టీ నాయకులు తీవ్ర విమర్శలు చేశారు. సూపరింటిండెంట్ కాంగ్రెసు తొత్తుగా వ్యవహరిస్తున్నారని తెలుగుదేశం నాయకులు అంటున్నారు.