చిరంజీవికి కృష్ణంరాజు గుడ్ బై

హైదరాబాద్: చిరంజీవి నాయకత్వంలోని ప్రజారాజ్యం పార్టీకి మరో పెద్ద ఎదురు దెబ్బ తగిలింది. కేంద్ర మాజీ మంత్రి, సినీ నటుడు కృష్ణంరాజు ప్రజారాజ్యం పార్టీకి రాజీనామా చేశారు. తన రాజీనామా లేఖను ఆయన పార్టీ కార్యాలయానికి పంపారు. కృష్ణంరాజు కాంగ్రెసు పార్టీలో చేరే అవకాశాలున్నట్లు తెలుస్తోంది. ఈ విషయమై చర్చించేందుకు ఆయన త్వరలో సన్నిహితులతో సమావేశమవుతారు.

ఎన్నికలకు ముందు కృష్ణంరాజు బిజెపికి రాజీనామా చేసి ప్రజారాజ్యం పార్టీలో చేరారు. ఆయన ప్రజారాజ్యం పార్టీ నుంచి రాజమండ్రి లోకసభ స్థానానికి పోటీ చేసి ఓడిపోయారు. నిజానికి, నర్సాపురం నుంచి పోటీ చేయాలని కృష్ణంరాజు అనుకున్నారు. గతంలో ఇక్కడి నుంచి ఆయన గెలిచి కేంద్ర మంత్రి కూడా అయ్యారు. అయితే, ఆయన ఇష్టానికి వ్యతిరేకంగా చిరంజీవి ఆయనను రాజమండ్రిలో పోటీకి దింపింది. ఎన్నికలు ముగిసిన తర్వాత కృష్ణంరాజు పార్టీకి దూరంగానే ఉంటున్నారు.