నా ఆఫీసునే తప్పంటారా: వైయస్

హైదరాబాద్: ఆర్టీసి మేనేజింగ్ డైరెక్టర్ దినేష్ రెడ్డిపై ముఖ్యమంత్రి డాక్టర్ వైయస్ రాజశేఖర రెడ్డి మరోసారి ఆగ్రహం వ్యక్తం చేశారు. ముఖ్యమంత్రి తనపై ఆగ్రహం వ్యక్తం చేయలేదని, సిఎం కార్యాలయ అధికారులు కావాలనే తప్పుడ సమాచారం ఇప్పించారని యూనియన్ నాయకుల చేత దినేష్ రెడ్డి ప్రకటన ఇప్పించడంపై ఆయన తీవ్రంగా స్పందించారు. ఇది క్రమశిక్షణా రాహిత్యం కిందికి వస్తుందని, ఇలాంటి చర్యలను సహించబోమని ఆయన అన్నారు.

శాసనసభా సమావేశాలున్నందున ఎవరు సెలవు తీసుకోవాలన్న ముందుగా ప్రభుత్వ ప్రధాన కార్యదర్శి అనుమతి తీసుకోవాలని చెప్పినా దినేష్ రెడ్డి పట్టించుకోకపోవడాన్ని తీవ్రంగా పరిగణిస్తామని ఆయన చెప్పారు. గ్యాస్ పైపు లైన్, సిఎన్జీ స్టేషన్ల ఏర్పాటుపై ఇటీవల సచివాలయంలో నిర్వహించిన సమావేశానికి దినేష్ రెడ్డి గైర్హాజరు కావడం పల్ల ముఖ్యమంత్రి ఆగ్రహం వ్యక్తం చేయడం సహజమేనని ముఖ్యమంత్రి కార్యాలయం స్పష్టం చేసింది.