కక్షలు: ముగ్గురి దారుణ హత్య

నల్లగొండ: నల్లగొండ జిల్లా దామరచర్ల మండలం బాలెంపల్లి గ్రామంలో రెండు వర్గాల మధ్య కక్షలు భగ్గుమన్నాయి. ఈ కక్షలకు ఇద్దరు కాంగ్రెసు కార్యకర్తలు, ఒక బాలుడు బలయ్యారు. దీంతో గ్రామంలో తీవ్ర ఉద్రిక్తత నెలకొంది. పోలీసులు గస్తీ కాస్తున్నారు. గ్రామాన్ని జిల్లా ఎస్పీ రాజేష్ కుమార్ సందర్శించి పరిస్థితిని పర్యవేక్షించారు. సర్పంచి హరినారాయణ, నాగులులను ప్రత్యర్థులు దాడి చేసి హత్య చేశారు. మిర్యాలగుడాలో బ్యాంకు నుంచి డబ్బులు తీసుకుని వస్తుండగా కాపు కాసి వారిని హత్య చేశారు. ఆ తర్వాత బాంబులతో దాడి చేశారు. ఈ దాడిలో రమావత్ బాలూజీ అనే బాలుడు మృతి చెందాడు.

మృతదేహాలను పోస్టుమార్టం నిమిత్తం మిర్యాలగుడా ఆస్పత్రికి తరలించారు. ఆస్పత్రి వద్ద విషాద వాతావరణం నెలకొని ఉంది. సిపిఎం, తెలుగుదేశం పార్టీ కార్యకర్తలే ఈ దాడులకు పాల్పడ్డారని మృతుల బంధువులు ఆరోపిస్తున్నారు. ఈ హత్యకాండలో సిపిఎం మిర్యాలగుడా శాసనసభ్యుడు జూలకంటి రంగారెడ్డి పాత్ర ఉందని కూడా వారు ఆరోపిస్తున్నారు. పాత కక్షలు గానీ, పార్టీ కక్షలు గానీ ఈ హత్యలకు కారణమై ఉండవచ్చునని ఎస్పీ రాజేష్ కుమార్ అంటున్నారు. ఇద్దరు నిందితులను అదుపులోకి తీసుకున్నట్లు ఆయన తెలిపారు.