విజయశాంతితో ప్రసన్నకుమార్ భేటీ

హైదరాబాద్: తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతితో తెలుగుదేశం పార్టీ నుంచి సస్పెండ్ అయిన శాసనసభ్యుడు నల్లపరెడ్డి ప్రసన్నకుమార్ రెడ్డి శనివారం సమావేశమయ్యారు. వారిద్దరి మధ్య తాజా రాజకీయ పరిణామాలపై చర్చ జరిగినట్లు చెబుతున్నారు. తెలంగాణ రాములమ్మ విజయశాంతి కాంగ్రెసు పార్టీలో చేరవచ్చుననే ప్రచారం జరుగుతున్న నేపథ్యంలో ఈ భేటీకి ప్రాధాన్యం చేకూరింది. ప్రసన్నకుమార్ రెడ్డి తమ తెలుగుదేశం పార్టీ అధ్యక్షుడు నారా చంద్రబాబు నాయుడిపై గత కొంత కాలంగా తీవ్ర విమర్శలు చేస్తున్న విషయం తెలిసిందే. ప్రసన్నకుమార్ రెడ్డి ముఖ్యమంత్రి డాక్టర్ వైయస్ రాజశేఖర రెడ్డి వైపు తన విధేయతను మార్చిన విషయం కూడా తెలిసిందే.

విజయశాంతి గత కొంత కాలంగా తెరాసకు దూరంగా ఉంటున్నారు. ఆమె కాంగ్రెసులోకి వెళ్లే అవకాశం ఉన్నట్లు వార్తలు వస్తున్నాయి. అయితే ఆమె మాత్రం పెదవి విప్పడం లేదు. తెరాసకు దూరమై కాంగ్రెసుకు దగ్గరైన నరేంద్ర, తూర్పు జయప్రకాష్ రెడ్డి వంటి నాయకులు తరుచుగా ఆమెతో సమావేశమవుతూనే ఉన్నారు. విజయశాంతిపై చర్య కోసం తెరాస నాయకత్వం వేచి చూసే ధోరణిని అవలంబిస్తోంది.