వాయిదా తీర్మానాలపై గందరగోళం

హైదరాబాద్: శాసనసభ సోమవారం ప్రారంభం కాగానే గందరగోళం చెలరేగింది. తాము ప్రతిపాదించిన వాయిదా తీర్మానాలపై ప్రతిపక్షాలు పట్టుబట్టడంతో తీవ్ర గందరగోళం చెలరేగింది. సభను స్పీకర్ కిరణ్ కుమార్ రెడ్డి రెండు సార్లు వాయిదా వేశారు. తొలుత ఒకసారి వాయిదా పడిన సభ తిరిగి సమావేశమైంది. అయినా పరిస్థితి అదుపులోకి రాకపోవడంతో మరోసారి స్పీకర్ సభను వాయిదా వేశారు. సభ వాయిదా పడిన తర్వాత కూడా ప్రతిపక్షాల సభ్యులు స్పీకర్ పోడియం వద్ద బైఠాయించారు.

రాష్ట్రంలో నెలకొన్న కరవు పరిస్థితులపై ప్రతిపక్షాలు ఉమ్మడి వాయిదా తీర్మానాన్ని ప్రతిపాదించాయి. స్వైన్ ఫ్లూ వ్యాధిపై బిజెపి, కర్ణాటక రాష్ట్రం అక్రమంగా సాగునీటి ప్రాజెక్టులు నిర్మిస్తోందని చెప్పలేమని కేంద్ర న్యాయ శాఖ మంత్రి వీరప్ప మొయిలీ చేసిన ప్రకటనపై తెలుగుదేశం పార్టీ వాయిదా తీర్మానాలు ప్రతిపాదించాయి. కరువు పరిస్థితులపై టిడిపి, టిఆర్ఎస్, పీఆర్పీ, వామపక్షాలు వాయిదా తీర్మానాన్ని ప్రతిపాదించాయి. వాటిని స్పీకర్ తోసి పుచ్చారు. అయితే చర్చ జరగాల్సిందేనని ప్రతిపక్షాలు పట్టుబట్టాయి.