యువతి గొంతు కోసిన ప్రేమోన్మాది

విజయనగరం: రాష్ట్రంలో మరో ప్రేమోన్మాది ఘాతుకానికి పాల్పడ్డాడు. ఈ సంఘటన విజయనగరం జిల్లా జామి మండలం కుమరాం బలరాంపురం గ్రామం వద్ద జరిగింది. అప్పారావు అనే ప్రేమోన్మాది బస్సులో ప్రయాణిస్తున్న భాగ్యలక్ష్మి అనే యువతిపై దాడి కత్తితో ఆమె గొంతు కోశాడు. తనను ప్రేమించడం లేదనే కోపంతో అతను ఈ దారుణానికి పాల్పడ్డాడు. కొద్ది రోజులుగా తనను ప్రేమించాలని, పెళ్లి చేసుకోవాలని అప్పారావు భాగ్యలక్ష్మిపై ఒత్తిడి తెస్తున్నాడు. ఆమె అందుకు ఒప్పుకోలేదు. దీంతో అతను గురువారం ఈ దాడికి పాల్పడ్డాడు.

సమాచారం తెలిసిన వెంటనే పోలీసులు రంగ ప్రవేశం చేసి బాధితురాలిని చికిత్స నిమిత్తం విజయనగరం ఆస్పత్రికి తరిలించాడు. నిందితుడిని పోలీసులు అదుపులోకి తీసుకున్నారు. ఈ ఘటనలో భాగ్యలక్ష్మి తీవ్రంగా గాయపడింది. ఈ సంఘటన స్థానికంగా సంచలనం సృష్టించింది.