ఇద్దరు రైతుల ఆత్మహత్య

హైదరాబాద్: రాష్ట్రంలో మంగళవారంనాడు ఇద్దరు రైతులు ఆత్మహత్య చేసుకున్నారు. రైతుల ఆత్మహత్యలు ఒకటి మహబూబ్ నగర్ జిల్లాలో జరగగా మరోటి కరీంనగర్ జిల్లాలో జరిగింది. మహబూబ్ నగర్ జిల్లా బిజినేపల్లి మండలం దుమ్మాయిపల్లి గ్రామంలో రాములు అనే రైతు పురుగు మందు తాగి ఆత్మహత్య చేసుకున్నాడు. నాలుగు ఎకరాల పొలం ఉన్న రాములు అప్పులు తెచ్చి ఆరు బోర్లు వేశాడు. ఆ బోర్లన్నీ విఫలమయ్యాయి. దీంతో చేసిన అప్పులు తీర్చే దారి లేక మనసు కృంగిపోయి ఆత్మహత్య చేసుకున్నాడు.

కరీంనగర్ జిల్లా బెజ్జంకి మండలం నాగంపేట గ్రామంలో ఎండిన పంట ఓ రైతు ప్రాణాలను బలి తీసుకుంది. శ్రీనివాస్ అనే రైతు ఆత్మహత్య చేసుకున్నాడు. అప్పులు తీర్చే మార్గం లేక, పరిస్థితి ఆశావహంగా లేక రాష్ట్రంలో రైతులు కొద్ది రోజులుగా ఆత్మహత్యలు చేసుకుంటున్నారు.